„Við höfðum alltaf væntingar þar sem liðið hefur staðið sig vel í undankeppninni. En fæstir bjuggust við að þeir kæmust í útsláttarkeppnina. En kraftaverk gerast og þau gerast enn,“ sagði Þórður Óskarsson, sendiherra Íslands í Bretlandi, í viðtali við Sky News í dag.

Englendingar eru margir furðu slegnir eftir að Ísland bar sigur úr býtum gegn enska liðinu á EM í gær og var Þórður fenginn til þess að útskýra hvernig sigurinn liti út frá bæjardyrum Íslands séð.

Spyrillinn benti Þórði á að þetta hefði verið ansi harkalegur sigur Íslands á Bretum, svo skömmu eftir að Bretar ákváðu að gera eins og Íslendingar og standa utan Evrópusambandsins.

„Ég held að það eina sem þetta tvennt eigi sameiginlegt er orðið exit,“ svaraði Þórður um hæl.

Hann segist hafa horft á leikinn á stað þar sem um 100 Íslendingar voru saman komnir og svipaður fjöldi Englendinga. „Þetta var mjög skemmtilegt kvöld. Þegar leikurinn hófst voru Englendingarnir ánægðir en síðan tókum við yfir, alveg eins og í leiknum. Fólk var svo í sigurvímu að leik loknum,“ sagði Þórður.

Spurður hvernig stemmningin sé á Íslandi þessa stundina sagði Þórður: „Stemmningin er góð. Fólk fagnar ákaflega og ég held að fólk hafi ekki áorkað miklu í vinnunni í dag. Nú eru allir með hugann við sunnudag og reynir fólk allt til að komast til Frakklands á leikinn.“

Iceland's ambassador to the UK @TordurOskarsson "We always had hope...miracles happen, and they are still happening" https://t.co/lc81eZTxtt

— Sky News Tonight (@SkyNewsTonight) June 28, 2016

Tengdar fréttir

EM 2016 í fótbolta

Danir slógu Evrópumeistarana úr leik

• Landsliðið tilnefnt til verðlauna – almenningur kýs
• Enska liðið mætti með smá hroka
• Þakklát fyrir boðið til Íslands
• Notkun gagnamagns jókst um 600%

» Fleiri tengdar fréttir

• Blogga um frétt