Mikið líf og fjör var í miðbænum í dag, en hiti fór hátt í 20 gráður sem er með því mesta sem mælst hefur í sumar. Fjölmargir nýttu góða veðrið til að sóla sig og njóta lífsins, en mbl.is fór á stúfana og fangaði stemninguna í bænum.
Allir viðmælendur mbl.is ætluðu að halda sig í bænum um verslunarmannahelgina, njóta sólarinnar og jafnvel skrifa nokkrar sögur. Einn sagðist ekki leggja í að fara á þjóðhátíð í Vestmannaeyjum, þar sem hann brenndi að eigin sögn nokkrum kílóum á dansgólfinu þegar hann gerði það síðast.
Frétt mbl.is: Hitinn gæti orðið sá mesti í sumar
Hitinn í sumar hefur mest farið í 18,9 gráður í borginni en það gerðist fyrr í þessum mánuði. Að sögn veðurfræðings hjá Veðurstofu Íslands kemur í ljós síðar í dag hvort hitinn í dag verður meiri.
Engar líkur eru aftur á móti á því að hitametið í Reykjavík verði slegið. Það var sett 30. júlí 2008 þegar hitinn mældist 25,7 gráður.
Spáð er álíka heitu veðri á höfuðborgarsvæðinu á morgun en eftir það fer að kólna.