Biðlistar styttast hratt

„Jú, þetta eru ánægjulegar tölur,“ segir Laura Scheving Thorsteinsson hjá Embætti landlæknis, en frá árinu 2007 hefur embættið staðið fyrir innköllun og úrvinnslu á stöðu biðlista eftir völdum aðgerðum á helstu aðgerðastöðum landsins.

Kallað er eftir þessum upplýsingum á þriggja mánaða fresti og unnið úr þeim. „Bráðaaðgerðir eru ekki inni í þessum tölum, því þær hafa alltaf forgang. Langur biðtími getur haft veruleg áhrif á lífsgæði fólks. Margir þjást af verkjum og geta ekki unnið á meðan þeir bíða,“ segir Laura Scheving.

Eftir átak sem hófst í mars hafa biðlistar eftir brjóskloss-, augasteina- og liðskiptaaðgerðum, aðgerðum vegna kviðslits og ýmsum öðrum aðgerðum styst verulega, að því er fram kemur í umfjöllun um mál þetta í Morgunblaðinu í dag.