Þrátt fyrir að Þjóðhátíð hafi ekki verið formlega sett fyrr en klukkan 14:30 í dag, var mikið líf í Herjólfsdal á hádegi. Sumir voru enn ryðgaðir eftir Húkkaraballið sem fór fram í gærkvöldi, en aðrir voru tilbúnir í átök helgarinnar.
Mbl.is náði tali af nokkrum hressum viðmælendum sem voru mjög spenntir fyrir helginni. Sumir voru spenntir fyrir tónlistaratriðunum á meðan aðrir sögðust hlakka mest til að fara í sleik.
Gera má ráð fyrir því að um 15 þúsund manns leggi leið sína til Vestmannaeyja um helgina, og taki þátt í þessari stærstu helgi Eyjamanna. Mbl.is fylgdi ferðalöngunum úr hlaði.
Meðal þeirra hljómsveita sem koma fram á hátíðinni í ár eru Agent Fresco, Úlfur Úlfur, Quarashi og Retro Stefson. Auk þess munu Jón Jónsson, Emmsjé Gauti, Friðrik Dór, Ragga Gísla, Helgi Björns, Stop Wait Go, FM95BLÖ, Rigg, Júníus Meyvant, Sverrir Bergmann, Sylvía og Sindri Freyr stíga á stokk.
Dagskrá Þjóðhátíðar má nálgast hér.
Veðurspáin fyrir Þjóðhátíð í Vestmannaeyjum lítur mjög vel út fyrir daginn í dag og á morgun; léttskýjað eða skýjað og hiti 11 til 13 stig.
Á sunnudag má hins vegar búast við skúraklökkum sunnan- og vestanlands, en þeir munu líklega halda sig meira inni á landinu en í Eyjum. Það gæti því gert skúraveður en eins er möguleiki á að Vestmannaeyjar sleppi við úrkomu þá.
Á mánudag má búast við enn meiri raka og skúrum um allt land, þar á meðal í Eyjum. Meira þegar líður á daginn, svo það er um að gera fyrir Þjóðhátíðargesti að pakka tjöldunum snemma, sé þess kostur og verði þurrt.