Kynna ný úrræði í húsnæðislánum

Sigurður Ingi Jóhannsson forsætisráðherra segir ríkisstjórnina ætla að kynna ný úrræði í húsnæðislánum eftir helgi.

Þar verður boðið upp á hvata til að taka óverðtryggð lán. „Annars vegar hyggjumst við með þessu koma myndarlega til móts við fyrstu kaupendur að fasteign og hins vegar taka mjög stór skref inn í breytingar á lánaformi sem mönnum mun bjóðast við íbúðakaup,“ sagði Sigurður Ingi í viðtali í þættinum Þjóðbraut á Hringbraut.

„Við erum að taka stór skref í anda tillagna sérfræðinga,“ bætti hann við.

Spurður út í skuldaleiðréttinguna og lægri vaxtabætur sagði Sigurður Ingi: „Er betra að vera svakalega skuldsettur og fá háar vaxtabætur eða er betra að hafa fengið skuldaleiðréttingu og eignast meiri hlut í sinni eign?“ 

„Ein af ástæðunum fyrir lægri vaxtabótum er vegna þess að tekjur hafa aukist og einnig vegna þess að fólk á meiri hlut í húsnæði sínu og borgar lægri vexti til bankans. Kaupmáttur launa hefur hækkað um rúmlega 20% á síðustu tveimur árum sem er fáheyrt í hinum vestræna heimi."

Sigurður Ingi sagði jafnframt að skattalækkanir á næstu árum séu fráleitar. „Til þess að viðhalda stöðugleika getur ríkisvaldið ekki aukið á þensluna með stórfelldum skattalækkunum.“

• 1 blogg um fréttina

Bloggað um fréttina

• Ægir Óskar Hallgrímsson: Meira endemis bullið..