Fjölgar ekki í takt við vöxt

Greinilega er full þörf á að halda vinnustaðaeftirliti áfram af fullum þunga því víða er pottur brotinn að sögn Hörpu Ólafsdóttur, hagfræðings Eflingar stéttarfélags.

Í samtali í Morgunblaðinu í dag segir hún, að margoft hafi komið í ljós að undanförnu að ekki sé greitt til stéttarfélaga af fjölda erlendra starfsmanna sem hingað koma á þjónustusamningum fyrirtækja, þar sem laun og greiðslur fara til heimalanda viðkomandi og eru ekki í samræmi við samninga og reglur á íslenskum vinnumarkaði.

Félagsmönnum í Eflingu hefur fjölgað mikið en komið hefur á daginn að fjöldi skráðra starfsmanna sem bæst hafa við í byggingariðnaði er þó langt undir því sem ætla má að sé starfandi hér ef miðað er við sýnilega þenslu í greininni.