Humarvertíðin enn slæm

Humarvertíðin í ár hefur verið afar slæm, alveg eins og síðustu ár, að sögn Þrastar Þorsteinssonar, fyrrverandi skipstjóra á Þorlákshöfn.

„Vertíðin var mjög góð framan af, í mars, apríl og maí, sérstaklega á Austurlandi. Síðan hefur þetta gengið frekar illa,“ segir Þröstur.

Þröstur segir að aðallega veiðist stór humar og að vantað hafi smáan humar í nokkur ár. Spurður hver ástæðan sé fyrir lélegri veiði segir hann að erfitt sé að vita það fyrir víst en að hærri hiti sjávar sé sennilega líklegasti þátturinn.