Japanstogararnir svokölluðu komust í fréttirnar á dögunum þegar einn þeirra, Bjartur NK frá Neskaupstað, var afhentur nýjum eigendum í Íran. Bjartur, sem nú heitir Artur, er á leið í Persaflóa, þar sem hann mun stunda veiðar.
Japanstogararnir voru tíu talsins og voru smíðaðir fyrir útgerðir víða um land á áttunda áratug síðustu aldar. Aðdraganda þess að tíu skuttogarar voru smíðaðir fyrir Íslendinga í Japan má rekja allt aftur til ársins 1971. Á þeim tíma voru mörg fyrirtæki, sveitarsjóðir og kaupfélög á landsbyggðinni að huga að skipakaupum, enda svokallað skuttogaratímabil þá um það bil að hefja innreið sína.
Í fréttaskýringu í Morgunblaðinu í dag segir, að Japanstogararnir hafi verið happafengur fyrir eigendur sína og íslensku þjóðina. Á þeim rúmlega 43 árum sem Bjartur NK var í eigu Síldarvinnslunnar hefði hann fiskað 142.730 tonn. Aflaverðmætið var talið nema 29 milljörðum miðað við núverandi fiskverð.