Búast má við áframhaldandi norðurljósasýningu í kvöld og á morgun en bæði er talsverð virkni á straumum sólvinda þessa dagana og þá ætti að vera gott útsýni og létt yfir um mest allt land í kvöld. Á morgun er spáð enn meiri virkni á rafsegulstraumum sem gæti gert norðurljósin enn tignarlegri, en skýjahula mun þá lauma sér yfir norðurlandið og skyggja á sýn á norðurhluta landsins.
Aðstandendur Stjörnufræðivefsins virðast bjartsýnir á að kvöldið verði gott fyrir norðurljósaunnendur, en á Facebook-síðu vefsins segir að norðurljósin verði „litskrúðug og kröftug eins og í gær. Gott að vera úti milli 22 og 00.“
Samkvæmt Veðurstofu Íslands er útlit fyrir að létt verði yfir öllu landinu núna í kvöld og ætti því að vera nokkuð góðar líkur á að sjá dýrðina leika um himininn. Ef skoðaðar eru tölur frá segulmælingastöðinni í Leirvogi sem Raunvísindastofnun Háskóla Íslands heldur úti má sjá að mestar sveiflur á segulmælingum voru milli miðnættis og þrjú síðustu nótt.
Norðurljósaspá Veðurstofu Íslands
Segir veðurfræðingur að á morgun sé útlit fyrir að það gangi skýjabakki yfir norðanvert landið þegar líða tekur á kvöldið. Það muni væntanlega skyggja á mest alla norðurljósasýningu, en svokallað Kp-gildi, sem segir til um hversu sterkir segulstormarnir eru sem valda norðurljósunum, verður þá í hæsta gildi sínu þessa dagana.
Við suðurströndina gæti einnig orðið lágskýjað næstu nótt, en ef fólk fer inn í landið ætti það að losna við öll ský að sögn veðurfræðings.
Fyrir áhugasama um fræðilega hlutann á bak við norðurljós og sólvinda er hægt að fræðast nánar um það hjá Stjörnufræðifélaginu, bæði í eftirfarandi Facebook-færslu og á vef félagsins.