Ljósaganga UN Women undir yfirskriftinni Konur á flótta, fór fram nú síðdegis á alþjóðlegum baráttudegi Sameinuðu þjóðanna gegn kynbundnu ofbeldi. Dagurinn markar upphaf 16 daga átaks gegn kynbundnu ofbeldi hér á landi, sem UN Women stendur stendur fyrir ásamt öðrum félagasamtökum.
Tónlistarhúsið Harpa var lýst upp í appelsínugulum lit líkt og fleiri byggingar víða um heim, en appelsínuguli liturinn er táknrænn fyrir von og bjarta framtíð kvenna og stúlkna án ofbeldis.
Í farabroddi ljósagöngunnar í ár var Maryam Raísi, sem ásamt móður sinni, Torpikey Farrash, hefur verið á flótta sl. 15 ár. Maryam flutti stutta hugvekju í upphaf göngunnar, en þegar hún var fjögurra ára gömul tóku talíbanar völdin í Afganistan og neyddust mæðgurnar þá til að flýja frá Kabúl. Allar götur síðan hafa þær verið á flótta og flakkað milli Írans og Afganistan.
Þegar stríðsherra í Afganistan ætlaði að taka sér Maryam sem konu flúðu mæðgurnar til Evrópu og síðar til Svíþjóðar eftir langt og strangt ferðalag. Eftir þriggja ára dvöl í Svíþjóð var þeim neitað um hæli þar og héldu þær þá til Íslands þar sem þeim var neitað um hæli eftir þriggja mánaða dvöl.
Í fjóra mánuði hafa þær beðið eftir símtali milli vonar og ótta, en í síðustu viku bárust þeim þær fréttir að kærunefnd útlendingamála hafi vísað málinu aftur til Útlendingastofnunar sem þýðir að þeim verður ekki vísað úr landi á grundvelli Dyflinnarreglugerðarinnar og mál þeirra verður skoðað frá upphafi hér.
Þátttaka Maryam í göngunni í ár er, að því er segir í fréttatilkynningu frá UN Women, táknræn fyrir þá hörmulegu stöðu sem milljónir flóttakvenna um allan heim búa við.