Birna Brjánsdóttir kvaddi föður sinn, sem hún býr með í Breiðholti, á föstudagsmorgun eins og venjulega. Um kvöldið fór hún ásamt vinkonu sinni í miðbæ Reykjavíkur. Þær spiluðu á Nora Magasin og fóru svo á skemmtistaðinn Húrra við Tryggvagötu til að dansa. Birna sást síðast á eftirlitsmyndavél við Laugaveg 31, undir morgun á laugardag.
Síðan þá hefur ekkert til hennar spurst.
„Þetta var fullkomlega eðlilegt kvöld,“ sagði Matthildur Soffía Jónsdóttir, vinkona hennar í samtali við Stöð 2.
Matthildur og Birna voru saman á Húrra til kl. 2 um nóttina eða þar til Matthildur ákvað að fara heim. Birna varð eftir á staðnum ásamt sameiginlegri vinkonu þeirra.
Um kl. 5 fór hún ein síns liðs út af Húrra. Birna sést svo í eftirlitsmyndavélum ganga ein austur Austurstræti, Bankastræti og Laugaveg að húsi nr. 31 þar sem hún hverfur sjónum um kl. 05:25.
Á myndum úr eftirlitsmyndavélum má sjá rauða fólksbifreið, sem sennilega er af gerðinni Kia Rio, ekið vestur Laugaveg á móts við hús nr. 31 kl. 05:25, á sama tíma og Birna var þar á ferð. Lögreglan hefur í tvo daga óskað eftir því að bílstjórinn gefi sig fram en án árangurs.
Í frétt Fréttablaðsins í morgun kemur fram að talið sé ólíklegt, en þó ekki útilokað, að Birna hafi farið upp í bíl á Laugavegi.
Í frétt Fréttablaðsins segir að þegar Birna var stödd við Klapparstíg var sími hennar tengdur við símamastur í húsnæði Máls og menningar við Laugaveg. Stuttu síðar tengdist hann við mastur við Lindargötu. Það er talið geta bent til þess að hún hafi ekki gengið áfram upp Laugaveg heldur beygt niður á Hverfisgötu. Þar eru færri eftirlitsmyndavélar. Skömmu síðar tengdist síminn við mastur á gamla Landsbankahúsinu á horni Barónsstígs og Laugavegar. Nokkrum mínútum síðar tengdist hann svo við símamastur við Listaháskólann á horni Sæbrautar og Laugarnesvegar. Út frá þessum gögnum, sem Fréttablaðið vísar til, er talið að þá hafi Birna verið komin í ökutæki á ferð.
Síðasta merki frá síma hennar var numið í mastri við Flatahraun í Hafnarfirði. Það var um klukkan sex að morgni laugardags.
Í kjölfarið er slökkt handvirkt á símanum.
Birna mætti ekki til vinnu í Hagkaup í Kringlunni að morgni laugardagsins. Var þá haft samband við foreldra hennar sem höfðu svo samband við lögregluna. Lögreglan lýsti eftir Birnu seint um kvöldið.
Sjálfboðaliðar, m.a. vinir og ættingjar Birnu, hófu strax leit það kvöld og um nóttina og allan næsta dag. Opnuð var Facebook-síða þar sem fólk deildi því hvar það væri að leita. Fólk leitaði í miðbæ Reykjavíkur, í Hafnarfirði og víðar.
Í gærmorgun, mánudaginn 16., fékk lögreglan aðstoð sérþjálfaðra björgunarsveitarmanna við leitina að Birnu. Leitað var meðal annars í 300 metra radíus frá staðnum á Laugavegi þar sem hún sást síðast á eftirlitsmyndavélum.
Seint í gærkvöldi fundu svo sjálfboðaliðar sem voru við leit skópar við birgðastöð Atlantsolíu við Hafnarfjarðarhöfn. Skóparið er af sömu tegund og Birna á. Ítarleg leit var gerð á svæðinu í nótt en án árangurs. Var svæðið lokað á meðan lögreglan leitaði frekari vísbendinga.
Leitinni að Birnu er áframhaldið í dag, aðallega við höfnina í Hafnarfirði.
Tugir björgunarsveitarmanna, sjálfboðaliða og lögreglumanna hafa komið að leitinni að Birnu. Sporhundar hafa verið notaðir sem og þyrla Landhelgisgæslunnar. Í morgun voru svo kallaðir til kafarar, drónar flugu yfir svæðið og kafbátur verður nýttur.