Fágætur 50 króna seðill seldist á dögunum fyrir um þrjár milljónir króna og fengu færri en vildu. Seðillinn var gefinn út fyrir ríkissjóð Íslands árið 1925.
Kristján X., konungur Íslands og Danmerkur, prýðir framhliðina og sjálf fjallkonan trónir á bakhlið, að því er fram kemur í umfjöllun um viðskipti þessi í Morgunblaðinu í dag.
„Ég veit af 7-8 öðrum svona seðlum auk þeirra eintaka sem Seðlabankinn á. 50 krónur voru hæsta verðgildi íslenskra peninga á þessum tíma,“ segir Þórarinn St. Halldórsson myntkaupmaður sem annaðist sölu á seðlinum sem var í einkaeigu.