„Þarna verðum við að þrauka þessa daga og það þarf ansi mikla skuldbindingu að ákveða að fara á hjara veraldar til að takast á við verkefnið að hætta að reykja,“ segir Valgeir Skagfjörð, leikari og markþjálfi.
Hann stendur fyrir námskeiði í samvinnu við Ferðafélag Íslands, um það hvernig losna má frá nikótínfíkninni, á Hornbjargsvita í byrjun júlí. „Þarna getur fólk ekki nálgast neinn varning og það fer enginn út í sjoppu.“
Hugmyndina sækir Valgeir til Halldórs vitavarðar Halldórssonar, sem er skálavörður Ferðafélagsins á Horni. „Þetta byggist á því að reykingamaðurinn fari í burtu úr sínu venjulega umhverfi,“ segir Valgeir í umfjöllun um mál þetta í Morgunblaðinu í dag.