Hússtjórnarskólinn í Hallormsstað verður að öllu óbreyttu ekki með kennslu í haust, því námið mætir ekki kröfum aðalnámskrár framhaldsskólanna.
Mennta- og menningarmálaráðuneytið tilkynnti skólanum í janúar síðastliðnum að ekki yrði af áframhaldandi stuðningi ráðuneytis við skólann sökum nemendafæðar og rekstrarsamningi var því sagt upp.
Að sögn ráðuneytisins uppfyllir Hússtjórnarskólinn ekki kröfur aðalnámskrár um námslok, en með því er átt við að námið leiði ekki til starfsréttinda, stúdentsprófs eða áframhaldandi náms, að því er fram kemur í umfjöllun um mál þetta í Morgunblaðinu í dag.