Braut kynferðislega á systur sinni

Maður hefur í Héraðsdómi Reykjavíkur verið dæmdur í tveggja ára og sex mánaða fangelsi, skilorðsbundið til fjögurra ára, fyrir nauðgun og kynferðisbrot gegn yngri systur sinni. Brotin voru framin á árunum þegar maðurinn var 16 ára gamall en systir hans þá talsvert yngri, á mörkum grunn- og leikskólaaldurs.

Hlýtur maðurinn því dóm yfir nauðgun og kynferðisbrot gegn barni með því að hafa hafa, í allt að átta skipti, haft önnur kynferðismök við systur sína með ólögmætri nauðung en hann hafi nýtt sér yfirburðarstöðu sína vegna aldurs-, þroska- og aflsmunar. Lét hann systur sína hafa við sig munnmök og í eitt eða tvö skipti setti hann getnaðarlim sinn inn í endaþarm hennar.

Þá var maðurinn fundinn sekur um kynferðislega áreitni gegn barni, með því að hafa tvisvar sinnum tekið í rass stúlkunnar utanklæða og hrist hann og einu sinni gripið í beran rass hennar.

Að því er fram kemur í dómnum opnaði stúlkan sig um brotin við námsráðgjafa nokkrum árum síðar og tilkynnti skólinn barnaverndaryfirvöldum um málið, hún hafi í framhaldinu átt viðtöl hjá sálfræðingi. Þá hafi ákærði komið í viðtöl til sálfræðings vegna vanlíðunar sem hann hafi glímt við um langt skeið sem hluta til tengdist óviðeigandi kynhegðun sem hann hafi sýnt gagnvart yngri systur. 

Samkvæmt skýrslu sálfræðings hafi ákærði verið þunglyndur, lítið virkur félagslega, atvinnulaus og ekki náð tökum á því að stunda nám um nokkurt skeið, en staða ákærða hefði breyst til batnaðar. Sterkar vísbendingar væru um að hann uppfyllti greiningarviðmið fyrir Asperger, hann hafi þó verið meðvitaður um að háttsemi hans í garð systur sinnar væri óviðeigandi og hann hafi upplifað eftirsjá, vanlíðan og skömm.

Systkynin hafa bæði verið í vitölum hjá fagaðilum vegna málsins og er það mat sálfræðings að engin hætta sé talin á að eitthvað álíka muni gerast á milli þeirra að því er rakið er í dómnum.

Ekki hagsmunir brotþola að bróðirinn fari í fangelsi

Í geðheilbrigðisrannsókn frá því í mars á þessu ári kemur fram að ákærði hafi verið sakhæfur í skilningi laga þegar brotin voru framin. Hann hafi haft viss þunglyndiseinkenni undanfarin ár og eitt sinn lagst inn á geðdeild í skamman tíma og grunur sé um að hann sé á einhverfurófi sem þó ekki hafi verið staðfest. Hann sé talinn hafa ADHD og sé með greind yfir meðallagi en að þau geðrænu einkenni sem lýst hefur verið  leiði ekki til ósakhæfis samkvæmt lögum né útiloki fangelsisrefsingu.

Ákærði játaði sök greiðlega og var ungur að árum er hann framdi brotin. Að því er segir í niðurstöðum dómsins hefur hann sýnt mikla iðrun og sent brotaþola bréf þar sem hann biðst fyrirgefningar á gerðum sínum og hefur hann leitað sér aðstoðar. Þá er sérstaklega til þess litið í dómnum að það hafi veruleg áhrif á systurina hvort bróðir hennar yrði dæmdur í fangelsi og er vanlíðan hennar að stórum hluta tengd því atriði. Hagsmunum hennar sé því betur borgið með því að ákærði fari ekki í fangelsi.

Komst dómurinn að þeirri niðurstöðu að maðurinn sæti fangelsi í 2 ár og 6 mánuði, skilorðsbundið til fjögurra ára. Þá ber honum einnig að greiða 1.873.695 krónur í sakarkostnað.

• Blogga um frétt