Veðrið lék við hunda og menn á túninu við Reiðhöll Fáks í Víðidal um helgina er fram fór þreföld hundasýning. Yfir 1.400 hundar voru skráðir til keppni og af 94 tegundum. Átta dómarar frá sjö löndum voru mættir á svæðið og skoðuðu m.a. feld, tennur og skapgerð hundanna og gáfu þeim einkunn.
Sýningin byrjaði á föstudag með hvolpasýningu. Þar kepptu 138 hvolpar af 36 tegundum. Í gær, laugardag, fór fram Reykjavík Winner-sýningin þar sem bestu hundar tegundar og bestu hundar af gagnstæðu kyni í tegund fengu nafnbótina RW-17.
Í dag fór svo alþjóðlega sýningin fram. Á hana mættu um 1.300 hundar til leiks.
Það var líf og fjör á túninu í Víðidal er ljósmyndari mbl.is mætti á svæðið.