Lögreglan á höfuðborgarsvæðinu handtók par í Álfheimum um hálf tíu í gærkvöldi. Fólkið, sem var ölvað, hafði komið sér fyrir í bílageymslu og nýbúið að nota fíkniefni þegar lögregla kom á vettvang.
Samkvæmt dagbók lögreglu var parið með fartölvu á sér sem talið er að sé þýfi. Þau gista fangageymslu lögreglunnar vegna rannsóknar á því hvaðan þýfið kom.
Á sjöunda tímanum í gærkvöldi handtók lögreglan mann í mjög annarlegu ástandi við Hlemm og um svipað leyti annan mann í svipuðu ástandi í bílageymslu í Mánatúni. Þeir gista báðir fangageymslur lögreglunnar vegna ástands.
Í nótt var tilkynnt um par sem var að brjótast inn í bifreiðar í Seljahverfi. Parið, sem var í annarlegu ástandi, var handtekið og gistir fangageymslur lögreglunnar.