Vel heppnuðu Reykjavíkurmaraþoni lokið
Setja bókamerki
Vel heppnuðu Reykjavíkurmaraþoni Íslandsbanka, sem haldið var í 34. sinn í dag, er nú lokið. Rúmlega fjórtán þúsund manns tóku þátt í fimm vegalengdum. Þetta kemur fram í fréttatilkynningu frá Íþróttabandalagi Reykjavíkur.
Veðrið lék við hlaupara í dag sem voru fjölmargir að bæta sinn besta árangur.
Sigurvegari í maraþoni karla var Arnar Pétursson sem hljóp á tímanum 2:28:17. Reykjavíkurmaraþonið er jafnframt Íslandsmeistaramót í maraþoni og því er Arnar líka Íslandsmeistari í maraþoni. Tími Arnars er besti tími sem Íslendingur hefur náð í maraþoninu og nýtt persónulegt met hjá honum.
Natasha Yaremczuk frá Kanada sigraði í maraþoni kvenna á tímanum 2:53:25. Tími Yaremczuk er 9. besti tími sem náðst hefur í maraþoni kvenna í sögu hlaupsins.
Fyrsta íslenska kona í mark og Íslandsmeistari í maraþoni 2017 var Ásta Kristín R. Parker en hún hljóp á tímanum 3:11:07.
Hlaupinu lauk á því að þátttakendur í Furðufatahlaupi Georgs hlupu úr Hljómskálagarðinum inn í markið í Lækjargötu í ýmsum furðufötum. Foreldrar margra áttu í fullu fangi við að halda í við spræku hlauparana sína sem fyrir hlaupið höfðu leikið sér í hoppuköstulum og öðrum skemmtilegum tækjum í garðinum, að því er fram kemur í tilkynningunni.
Á síðunni Hlaupastyrkur.is safna þátttakendur Reykjavíkurmaraþons áheitum og þar má sjá að þegar hafa safnast yfir 111 milljónir króna. Enn er hægt að leggja góðu málefni lið í gegnum síðuna.
Heildarúrslit í tímatökuvegalengdum má finna á heimasíðu hlaupsins. 1.490 hlupu heilt maraþon, 2.963 voru skráðir til leiks í hálfu maraþoni og 6.747 hlupu tíu kílómetra. 1.835 tóku svo þátt í skemmtiskokki og tæplega 1.200 í furðufatahlaupi Georgs.
Mikilvægt að vera á tánum
29 nautgripir fundust dauðir
Hafa „ágætis tíma“ til úrbóta
Unnu að fullum heillindum að kaupum á TM
Nauðgaði kærustu sinni og tók það upp
Spursmál: Fyrsta stóra viðtal Katrínar
Almannavarnir auka viðbúnað