„Honum gengur bara vel, hann svaf í morgun og missti náttúrlega flesta fram fyrir sig, en nú þurfa þeir að hvíla sig,“ segir Vilberg Helgason, einn þriggja í fylgdarliði hjólreiðamannsins Eiríks Inga Jóhannssonar, sem nú tekur þátt í langri maraþon-hjólreiðakeppni hringinn í kringum Írland.
Eiríkur Ingi er öflugur hjólreiðakappi og hefur meðal annars þrívegis tekið þátt í Wow-Cyclothon-keppninni hérlendis og stóð uppi sem sigurvegari þar síðasta sumar.
„Við lögðum af stað 16:36 í gær og hann hjólaði til sex í morgun. Hann var fyrstur framan af, þangað til að hann hvíldi sig í morgun og fékk sér góðan svefn til þess að eiga góðan dag fram undan,“ segir Vilberg.
Góður svefn í hjólreiðakeppni sem þessari er þó ekki langur. „Hann er búinn að sofa fjóra tíma núna í það heila. Hann svaf pínu, hjólaði smá og komst að því að hann þyrfti að sofa aðeins meira til að vera ferskur.“
Eiríkur er sem stendur níundi af ellefu keppendum í einstaklingsflokki karla og staddur á nyrsta odda Írlands, Malin Head.
Hægt er að rekja ferðir keppenda og fylgjast með stöðunni í beinni hér.
Leiðin sem hjóluð er liggur umhverfis allt Írland, en keppnin hófst í nágrenni Dyflinnar og þaðan var haldið í norður, fram hjá Belfast, höfuðborg Norður-Írlands, og áfram meðfram ströndinni. Alls er leiðin 2.150 kílómetrar, með 23 þúsund metra hækkun.
Samanlögð heildarhækkun á leiðinni er því svipuð og samanlögð hæð hinna þekktu tinda, Everest, K2 og Kilimanjaro.
„Þetta er gríðarleg hækkun. Við erum einmitt búin að vera í stanslausri hækkun núna í ríflega fimmtán mínútur,“ segir Vilberg, en keppendur hafa fimm daga til að ljúka för sinni umhverfis eyjuna.
„Við höfum fram á föstudag til að klára og stefnum á að klára mun fyrr en það, ef hægt er. Fyrsta markmiðið er þó að klára. Miðað við gengið í gær virðist okkur ætla að ganga vel, þó að við vitum ekki alveg hvernig þetta fari enn þá,“ en hann segir líklegt að á morgun verði línur farnar að skýrast frekar, þegar allir keppendur verði búnir að hvíla sig að minnsta kosti tvívegis.
Vilberg segir það skemmtilegt að keyra á eftir Eiríki sem leið hans liggur um írsku sveitirnar. „Við erum þrjú með honum, einn sofandi í skottinu núna, ein að keyra og ég að lóðsa. Tíminn líður alveg fáránlega hratt. Í fyrsta lagi er gullfallegt á Írlandi, þó að það sé rigning akkúrat núna, en svo er þetta bara eins og horfa á fótbolta. Þú heldur með þínum manni og fylgist með spenntur þó að það sé ekkert verið að spila rosalega hratt.“
Hann segir umferðina þægilega til hjólreiða, aðallega sé hjólað á hálf-aflögðum sveitavegum. „Þetta er búið að vera mjög gott og engin teljandi þungaumferð sem við höfum lent í. Það er alveg frábært að hjóla hérna á mörgu leyti.“