Síðasta Fokker-vélin kveður Ísland

Síðasta Fokker-vél Air Iceland Connect flaug af landi brott frá Reykjavíkurflugvelli í morgun. Þetta eru mikil tímamót hjá flugfélaginu því Fokker-vélar hafa verið í rekstri þess frá árinu 1965, eða í yfir hálfa öld. 

Flugvélinni var flogið til Hollands þar sem nýir eigendur frá Kanada taka við henni. Margir kassar með viðhaldsskýrslum og öðrum pappírum sem tengjast vélinni fylgdu með í fluginu.

Vélin sem tók á loft í morgun er Fokker-50 sem kallast TF-JMS. Hún er síðust af fjórum Fokker-50 vélum sem kanadíska fyrirtækið Avmax keypti af Air Iceland Connect.

Að sögn Árna Gunnarssonar, framkvæmdastjóra Air Iceland Connect, er TF-JMS ein af þeim vélum sem kom ný til landsins árið 1991. Flestar voru Fokker-vélarnar sex í eigu flugfélagsins en tvær þeirra voru seldar fyrir nokkrum árum. Hinar fjórar bættust svo í hópinn á þessu ári.

Framleiðsla á vélunum hætti árið 1995 og var kominn tími á endurnýjun á flotanum. Í staðinn voru keyptar Bombardier Q400-flugvélar.