Fljótsdalshéraðsdeild Rauða krossins hefur opnað fjöldahjálparstöð á Egilsstöðum þar sem tekið verður á móti farþegum rútu sem lentu í slysi í Víðidal. Þetta kemur fram í tilkynningu frá Rauða krossinum.
Farþegar sem ekki þurfa á læknisaðstoð að halda munu þar fá mat að borða auk sálræns stuðnings frá sjálfboðaliðum Rauða krossins.
Eins og áður hefur verið greint frá voru níu björgunarsveitir á Norðausturlandi kallaðar út eftir rútuslys í Víðidal á Austurlandi. Rúta ók þá aftan á snjóruðningstæki en samkvæmt upplýsingum frá lögreglunni á Egilsstöðum er einn slasaður, þó ekki alvarlega. Fimm aðrir meiddust lítillega.