Vitlaust veður næstu tvo sólarhringa

Vaxandi lægð fyrir austan land ásamt öflugri hæð yfir Grænlandi veldur því að næstu tvo sólarhringa verður nær samfellt hríðarveður með skafrenningi frá Vestfjörðum og austur á land.  

Þetta kemur fram í tilkynningu frá Vegagerðinni en Veðurstofan er með appelsínugula viðvörun á Vestfjörðum, Norðurlandi og Suðausturlandi. Búist er við vindhraða upp á 17-22 m/s og að skyggni verði jafnvel minna en 100 metrar.

Þá verða sviptivindar viðvarandi undir Eyjafjöllum og í Mýradal 30-40 m/s. Frá Lómagnúpi og austur að Höfn, allt að 45 m/s í hviðum og síðar meir einnig í Hamarsfirði og á sunnanverðum Austfjörðum.

Lokanir vega

Líkur eru á því að ekki verði unnt að opna fyrir umferð um Skeiðarársand og Öræfasveit fyrr en hugsanlega um miðjan dag á morgun, fimmtudag. Í fyrramálið er jafnframt reiknað með því að lokunarsvæði muni ná allt austur að Höfn.

Búist er við því að grípa verði til lokana á Hringvegi frá Markarfljóti að Vík frá því seint í kvöld og fram á morgundaginn.

Mývatns- og Möðrudalsöræfi eru nú lokuð, ekki eru líkur á því að unnt verði að opna næsta sólarhringinn. Enn fremur er búist er við víðtækum lokunum vega á Norður- og Austurlandi strax í fyrramálið og síðdegis á fimmtudag einnig á Vestfjörðum.

Vísbendingar eru um að ekki verði unnt að hefja hreinsun heiðarvega og langleiða á Norður- og Austurlandi fyrr en á laugardagsmorgun, en líklega fyrr á Vestfjörðum. Áætlun verður uppfærð eftir því sem veðri og spám vindur fram.

• Blogga um frétt