Heimilislaus karlmaður hefur sofið í bílakjallara Ráðhúss Reykjavíkur í nokkra mánuði. Hann segir lætin sem stundum eru í gistiskýlinu við Lindargötu ekki eiga við sig.
Þetta kom fram í kvöldfréttum Stöðvar 2.
Hann sagði ekkert pláss á Lindargötu fyrir þá sem eru ekki að drekka og í eiturlyfjum.
Einnig sagði hann starfsmenn ráðhússins hafa gert nokkrar athugasemdir við búsetuna í bílakjallaranum. Sumir þeirra hafa fært honum ýmislegt, þar á meðal sæng og teppi. Tvívegis hefur verið keyrt á hann í kjallaranum.
Í frétt Stöðvar 2 kom fram að 349 manns séu heimilislausir í Reykjavík, samanborið við 179 fyrir fimm árum.
Átján manns búa á tjaldstæðinu í Laugardal, samkvæmt úttekt velferðarsviðs borgarinnar.