Ef fram heldur sem horfir mun alvarlega slösuðum og látnum í umferðarslysum á árinu 2017 fækka talsvert frá fyrri árum.
Þetta kemur fram í tölum frá Samgöngustofu en fækkunin er um 21% á milli ára. Þórhildur Elínardóttir, samskiptastjóri Samgöngustofu, segir ýmsar ástæður geta legið að baki en hún telji þó að fræðsla og forvarnarstarf til ungra ökumanna eigi þátt í lækkuninni.
„Mesta bætingin er hjá ungu fólki og eiga þau hrós skilið fyrir það, við teljum að fræðslan sé að skila sér til þessa hóps,“ segir Þórhildur í umfjöllun um slysin í umferðinni á árinu í Morgunblaðinu í dag, en auk þess hefur fjöldi slysa erlendra ferðamanna dregist örlítið saman.