Ekkert ferðaveður

Um 100 km norður af Melrakkasléttu er kröpp 983 mb lægð á leið norðaustur, en hún gerði sér ferð yfir landið í nótt. Það rigndi og hvessti sökum hennar og hefur vindur mælst víða yfir 20 m/s.

Ennþá á eftir að hvessa um landið norðaustanvert en þá rofar einnig til. Það fer ekki að lægja að ráði fyrr en uppúr hádegi og því eru gular viðvarnir í gildi fyrir austurhelming landsins. 
Hægari vindur er vestantil á landinu, 10-15 m/s en búast má við rigningu eða súld norðvestantil fram eftir morgni, en yfirleitt skýjað og víða skúrir sunnanlands. Heldur hægari vindur og úrkomuminna í kvöld, segir í hugleiðingum veðurfræðings á Veðurstofu Íslands.

Veðurspá fyrir næstu daga

Vestan og suðvestan hvassviðri eða stormur, 15-23 m/s, um landið austanvert, en 10-15 m/s vestantil. Víða skúrir, en yfirleitt þurrt á Austurlandi. Dregur úr vindi fyrir austan eftir hádegi, 10-15 í kvöld. Suðvestan 8-13, skýjað og stöku skúrir á morgun, en bjart með köflum norðan- og austanlands. Hiti 8 til 16 stig að deginum, hlýjast á norðaustantil.

Á þriðjudag

Suðvestan 5-10, skýjað og stöku skúrir, en bjart með köflum norðan- og austanlands. Hiti 8 til 15 stig að deginum, hlýjast á Austurlandi. 

Á miðvikudag:
Hæg suðvestlæg eða breytileg átt og víða bjartviðri, einkum austantil, en dálítil rignig um tíma á Vesturlandi. Hiti breytist lítið. 

Á fimmtudag:
Hæg suðlæg átt og bjartviðri, en gengur í suðaustan 8-13 m/s með rigningu sunnan- og vestanlands síðdegis. Hiti 11 til 18 stig, hlýjast norðaustanlands. 

Á föstudag:
Hæg sunnanátt og víða dálítil væta en úrkomulítið norðaustantil. Hiti 12 til 20 stig, hlýjast á Austurlandi. 

Á laugardag og sunnudag:
Útlit fyrir vestlægar áttir með rigningu eða súld með köflum um land allt. Hiti 10 til 15 stig.