Hafa 10 daga til að skila framtali

Opnað verður fyrir framtalsskil 2020, vegna tekna ársins 2019, um næstu mánaðamót. Lokaskiladagur verður 10. mars. Hægt verður að sækja um nokkurra daga viðbótarfrest. Í fyrra var lokafrestur til 12. mars.

Framtalið verður aðgengilegt frá og með næstu helgi á þjónustuvef Skattsins, www.skattur.is og ber öllum þeim sem náð hafa 16 ára aldri í lok árs 2019 að skila skattframtali og telja fram tekjur sínar og eignir, að því er fram kemur á vef Skattsins.

Notast þarf við rafræn skilríki til auðkenningar við innskráningu eða veflykil. Framtöl á pappír heyra sögunni til.

Upplýsingar um t.d. launatekjur, skuldir, fasteignir og aðrar eignir, dagpeninga, hlutabréf, greiðslur og styrki eru forskráðar á framtölin og ætti því meirihluti framteljenda ekki að þurfa að gera annað en að fara vel yfir framtöl sín og staðfesta þau síðan við skil.

Framtalsleiðbeiningar eru komnar á vefinn. Lendi fólk í vandræðum með framtal sitt verður einnig hægt að hafa samband við framtalsaðstoð Skattsins. Útlendingum hefur fjölgað mikið hér á landi á síðustu árum. Leiðbeiningar á erlendum tungumálum eru birtar á vef Skattsins.

sisi@mbl.is