Fyrirtækin sem styrktu mörg í erfiðleikum

Af þeim 18 fyrirtækjum, sem veittu Sjálfstæðisflokknum og Samfylkingunni styrki að fjárhæð 1 milljón eða meira árið 2006, er yfir helmingur í greiðslustöðvun eða á við mikla fjárhagserfiðleika að etja.

Bæði  Sjálfstæðisflokkur og Samfylking hafa birt lista yfir þau fyrirtæki, sem veittu flokkunum hæstu styrkina á árinu 2006. Gömlu bankarnir þrír, Glitnir, Landsbankinn og Kaupþing,  voru örlátir við flokkana og Landsbankinn veitti Sjálfstæðisflokknum m.a. samtals 30 milljónir í styrk. Allir gömlu bankarnir eru nú í greiðslustöðvun og undir stjórn skilanefndar. Það sama er að segja um Straum-Burðarás  SPRON, Teymi og FL Group, nú Stoðir en síðastnefnda félagið veitti Sjálfstæðisflokki  30 milljóna króna styrk þetta ár.

Baugur Group hefur verið tekinn til gjaldþrotaskipta en félagið veitti Samfylkingunni  3 milljóna króna styrk árið 2006.  Exista, sem styrkti Sjálfstæðisflokkinn um 3 milljónir, Eimskip, sem styrkti Samfylkingu um 1 milljón, Milestone, sem veitti Samfylkingunni  1,5 milljóna króna styrk, og Eignarhaldsfélag Samvinnutrygginga, nú Eignarhaldsfélagið Gift, sem veitti Samfylkingunni 1 milljón, eru í miklum rekstrarerfiðleikum.  

Listi yfir fyrirtæki sem styrktu Sjálfstæðisflokk um 1 milljón eða meira árið 2006:

Exista                                         3 milljónir
FL-Group                                   30 milljónir 
Glitnir banki                                 5 milljónir
KB-banki                                      4 milljónir
Landsbanki Íslands                      5 milljónir
Landsbanki Íslands                    25 milljónir
MP-Fjárfestingarbanki                  2 milljónir
Straumur-Burðarás                    2,5 milljónir
Tryggingamiðstöðin                      2 milljónir
Þorbjörn                                    2,4 milljónir

Listi yfir fyrirtæki sem styrktu Samfylkingu um yfir 500 þúsund krónur árið 2006:

Actavis                                                  3 milljónir 
Baugur Group                                       3 milljónir
Eignarhaldsfélag Samvinnutrygginga    1 milljón
Eimskipafélag Íslands                           1 milljón      
Exista                                                    3 milljónir       
Eykt                                                       1 milljón       
FL-Group                                                3 milljónir
Glitnir                                                   3,5 milljónir       
Kaupþing                                                5 milljónir
Ker                                                          3 milljónir       
Landsbanki Íslands                                 4 milljónir 
Milestone                                             1,5 milljónir       
SPRON                                                    1 milljón      
Straumur Burðarás                               1,5 milljónir       
Teymi                                                    1,5 milljónir.       
        

• 1 blogg um fréttina

Bloggað um fréttina

• Einar Guðjónsson: Öll á hausnum nema tvö