Innlent | Kosningar | mbl | 28.10.2016 | 23:17 | Uppfært 29.10.2016 9:45

32.410 atkvæði komin í hús

Ljósmyndari náði mynd af kjósanda sem hljóp í Perluna á síðustu mínútu utankjörfundaratkvæðagreiðslunnar í kvöld. Eggert Jóhannesson

Heildarfjöldi utankjörfundaratkvæða sem greidd hafa verið á kjörstöðum eða borist aðsend til kjörstjórnar er í heildina 32.410 talsins á landinu öllu. Þetta staðfestir Bergþóra Sigmundsdóttir, sviðstjóri þinglýsinga og leyfasviðs hjá Sýslumanninum á höfuðborgarsvæðinu, í samtali við mbl.is.

Hjá Sýslumanninum á höfuðborgarsvæðinu voru samtals 19.201 búnir að kjósa á kjörstað, þar af 3.759 í dag. Til viðbótar höfðu borist 2.913 aðsend atkvæði. Samtals fjöldi atkvæða í höfuðborginni voru því 22.115.

Mikill fjöldi mætti í dag og kaus. Eggert Jóhannesson

Að talningu lokinni var farið með kjörkassana á brott. Eggert Jóhannesson

Bergþóra segir að í alþingiskosningunum 2013 hafi 16.257 verið búnir að kjósa hjá Sýslumanninum í Reykjavík samanborið við 19.201 núna hjá Sýslumanninum á höfuðborgarsvæðinu.

Á móti komi að embættin á höfuðborgarsvæðinu hafa verið sameinuð síðan þá og segir hún að líklega sé fjöldinn örlítið minni í ár en fyrir rúmlega þremur árum. Í forsetakjörinu í sumar var tala þeirra sem höfðu kosið hjá sýslumanninum utankjörfundar samtals 15.829.