Kristján H. Johannessen
Þeir sjö stjórnmálaflokkar sem líklegastir eru til að eiga fulltrúa á Alþingi eftir komandi þingkosningar eru allir hlynntir breytingum á stjórnarskrá Íslands.
Einn þeirra telur hins vegar brýnt að þær séu gerðar af yfirvegun og í áföngum til að skapa þverpólitíska sátt.
Framsóknarflokkurinn hafnar hugmyndum um að landið verði gert að einu kjördæmi. Samfylkingin vill breytingar á grundvelli stjórnlagaráðs. Sjálfstæðisflokkurinn telur að fara skuli varlega í breytingar á stjórnarskránni en Píratar vilja setja nýja stjórnarskrá í forgang á næsta kjörtímabili og „uppfæra“ þannig Ísland. Viðreisn vill endurskoðun í áföngum og Vinstri græn segjast vilja „ljúka þeirri vinnu sem hófst með þjóðfundinum 2010 og klára nýja stjórnarskrá sem byggist á tillögum Stjórnlagaráðs.“