Uppgötvunin kann að vera góð vísbending um fjölbreytilegt dýralíf á tímabilinu fyrir það 165 milljón ára tímabil sem risaeðlur fóru um jörðina Reuters

Vísindamenn hafa grafið upp bein dýrs sem minnir á risaeðlurnar, en virðist hafa verið uppi a.m.k. 10 milljón árum fyrr en þær risaeðlur sem vitað hefur verið um til þessa.

Dýrið fannst í Tansaníu og hefur verið gefið heitið Asilisaurus kongwe. Dýrið, sem m.a. lifði á plöntum, hefði náð mönnum upp í mitti  og var uppi fyrir um 240 milljón árum síðan, segir í rannsókn sem birt er í nýjasta hefti Nature. 

Fundurinn á Asilisaurus kongwe hefur í för með sér að vísindamennirnir telja nú líklegt að risaeðla hafi fyrst orðið vart mun fyrr en hingað til hefur verið talið. Þá sé uppgötvunin líka góð vísbending um fjölbreytilegt dýralíf á tímabilinu fyrir það 165 milljón ára tímabil sem risaeðlur fóru um jörðina.

„Þessar nýju sannanir benda til þess að þær hafi i raun aðeins verið einn af nokkrum ólíkum dýrahópum sem þróuðust á Triassic-tímabilinu,“ sagði  Sterling Nesbitt, vísindamaður við háskólann í Texas.

Steingervingar u.þ.b. 14 Asilisaurus kongwe dýra fundust í uppgreftrarsvæði í suðurhluta Tansaníu, og náðu vísindamenn að endurgera nokkuð heillega beinagrind, þar sem einungis vantar litla hluta höfðs og framleggja.

Dýrið var um hálfur til einn metri á hæð og tveir til þrír metrar á lengd. Það vóg 10-30 kg og gekk á fjórum fótum. Lögun tanna og neðri kjálka bendir til þess að það hafi geta neytt bæði jurta og kjöts. Slíkt getur að mati vísindamannanna bent til þess að dýrið hafi upphaflega verið kjötæta, en síðan þróast yfir í alætu til að bæta lífsskilyrði sín.