Ný rannsókn bendir til þess að lyf sem notað er gegn maurakláða geti einnig virkað gegn lús sem orðin er ónæm fyrir þeim lyfjum sem hingað til hafa verið notuð.

Talið er að a.m.k. 100 milljón manns á heimsvísu glími við lús á hverju einasta ári. Sérstaklega eru það börn á leik- og grunnskólaaldri sem fá þennan óboðna gest. Þetta kemur fram í grein í læknatímaritinu New England Journal of Medicine.

Fram til þessa hefur helsta ráðið við lús verið að þvo hárið upp úr útþynntu skordýraeitri í sápuformi sem nefnist annars vegar permethrin og hins vegar malathion. Síðan á tíunda áratug síðustu aldar eru lýs í auknu mæli orðnar ónæmar fyrir þessum efnum.

Það hefur gert það að verkum að foreldrar hafa í mörgum tilfellum ekki átt val um annað en að fínkemba hár barna sinna og leita þannig að lúsum.
 
Lyfið ivermectin sem hingað til hefur verið notað gegn maurakláða er, að sögn franskra vísindamanna, ný árangursrík leið til þess að losna við lús.

Lyfið hefur verið prófað í rannsókn sem náði til 812 fullorðinna og barna á 376 heimilum á Bretlandi, Frakklandi, Írlandi og Ísrael.

Helmingur þátttakenda var meðhöndlaður með malathion og hinn helmingurinn með ivermectin, en lyfin voru gefin tvisvar með sjö daga millibili.

Að tveimur vikum liðnum kom í ljós að 95,2% þeirra sem fengu ivermectin voru laus við lúsina en aðeins 85% þeirra sem fengu malathion.

„Ivermectin er árangursríkari leið en þær sápur sem notaðar hafa verið. Hins vegar ætti aðeins að nota lyfið í erfiðum tilfellum,“ segir Olivier Chosidow, sem hafði umsjón með rannsókninni en hann starfar fyrir Heilbrigðisstofnun Frakklands og Lyfjarannsóknir.

Bætti hann við að ofnotkun á ivermectin gæti valdið ónæmi hjá lúsinni líkt og gerst hefði með önnur lyf.