Íslenskt mataræði það hollasta í heimi

Íslenskt mataræði er það hollasta í heimi ef marka má niðurstöður rannsóknar sem gerð var í tengslum við þáttinn The World's Best Diet sem sýndur er á sjónvarpsstöðinni Channel 4 á Englandi. Ferskur fiskur, hágæða kjöt og mjólkurvörur eru sagðar ástæður þess að Ísland hafi að bjóða hollasta mataræðið. Fjallað er um þáttinn á fréttavefnum Metro.

Niðurstöður rannsóknarinnar eru byggðar á tölfræði um offitu, lífslíkur, áfengisneyslu og fleira. Um þetta er fjallað á vef sjónvarpsstöðvarinnar Channel 4 en þar er einnig tekið fram að með hollu mataræði sé hægt að draga úr líkum á því að fá krabbamein.

Niðurstöðurnar leiddu í ljós að breskt mataræði er afar óhollt en England lenti í 34. sæti og Ástralía og Bandaríkin voru í enn lægra sæti.

Listinn yfir löndin er ekki endanlegur en honum er ætlað að vekja umræður um hvað hægt sé að læra af matarvenjum annarra landa.

• 1 blogg um fréttina

Bloggað um fréttina

• Mofi: Hvaða mataræði er best?