JÓN Geir Pétursson, skógfræðingur hjá Skógræktarfélagi Íslands, segir að taka þurfi á uppsprettum svifryks en ein leið til að draga úr svifryki sé að gróðursetja sígræn tré við umferðargötur.
JÓN Geir Pétursson, skógfræðingur hjá Skógræktarfélagi Íslands, segir að taka þurfi á uppsprettum svifryks en ein leið til að draga úr svifryki sé að gróðursetja sígræn tré við umferðargötur.

Svifryk er mun meira á höfuðborgarsvæðinu á veturna en á sumrin og er mikið umhverfisvandamál í þéttbýlinu á suðvesturhorninu og á Akureyri. Jón Geir Pétursson segir að uppspænt malbik af völdum nagladekkjanotkunar að vetri til sé helsta uppspretta svifryks og á þessu þurfi að taka. Hann bendir á að þar sem tré geti tekið upp svifryksagnir auk þess sem þær setjist á barr og lauf sé tilvalið að gróðursetja tré samsíða umferðaræðum.

"Sérstaklega sígræn tré sem standa græn á veturna þegar svifrykið er hvað mest," segir hann. "Þau virka eins og greiður, ekki síst þegar þau standa nærri umferðaræðunum, og geta veitt í sig óhemjumikið af svifryki."

Mikilvægt hlutverk trjáa

Jón Geir segir að aðstæður til trjáræktar við umferðaræðar á höfuðborgarsvæðinu séu yfirleitt mjög góðar og því ætti að vera auðvelt að koma upp neti af öflugum trjágróðri sem gæti síað svifrykið við umferðaræðarnar. Hann bendir á að rykið þyrlist líka síður upp séu tré nálægt þessum æðum. Auk þess skapi trén skjól, hafi áhrif á hljóðmengun og séu ennfremur yfirleitt til prýði.

"Það er grafalvarlegt mál þegar svifryksmörkin fara yfir heilsuverndarmörk því það hefur bein áhrif á heilsu fólks," segir hann.