Senda inn efni
Roman Pavlyuchenko fær lítið að spila á White Hart Lane. Reuters
Rússinn vill burt frá Tottenham
Rússneski knattspyrnumaðurinn Roman Pavlyuchenko ætlar að krefjast þess að vera seldur frá enska úrvalsdeildarfélaginu Tottenham Hotspur.
Rússneska íþróttadagblaðið Sport Express hafði þetta eftir honum í dag. „Ég vil komast í burtu. Ég hef setið á varamannabekknum og það hefur kostað mig sætið í rússneska landsliðinu. Ég vil spila, ekki sitja á bekknum," sagði sóknarmaðurinn sem hefur aðeins komið við sögu í sex leikjum Lundúnaliðsins á þessu tímabili.
Hann hefur mátt víkja fyrir þeim Robbie Keane og Jermain Defoe, sem Harry Redknapp knattspyrnustjóri stillir helst upp sem framherjapari sínu. Peter Crouch, enski landsliðsmiðherjinn, er næstur í goggunarröðinni og því djúpt á því að Redknapp stilli Pavlyuchenko upp í byrjunarliði sínu.
„Stjórinn sagðist í upphafi tímabilsins þurfa á fjórum framherjum að halda en nú segir hann að þrír dugi sér vel. Ég er sá fjórði og það er því augljóst að ég verð að koma mér burt. Það eina sem gæti komið í veg fyrir það væri of hátt kaupverð, en ég mun krefjast þess að fá að fara. Aðalmálið er að komast að samkomulag sem Tottenham, ég og næsta félag mitt getum öll sætt okkur við," sagði Pavlyuchenko.
Hann er 27 ára gamall og Tottenham greiddi Spartak Moskva heilar 14 milljónir punda fyrir hann í ágúst á síðasta ári.
Til baka