Senda inn efni
Sænski landsliðsmaðurinn Erik Edman. Reuters
Edman hættur hjá Wigan
Sænski knattspyrnumaðurinn Erik Edman hefur verið leystur undan samningi við enska úrvalsdeildarfélagið Wigan. Hann er búinn að semja við sitt gamla félag Helsingborg og leikur með því í sænsku úrvalsdeildinni á komandi tímabili þar.
Edman, sem er 31 árs vinstri bakvörður, hefur aðeins spilað fjóra leiki í úrvalsdeildinni í vetur. Hann missti stöðu sína eftir að Aaron Lennon lék hann grátt í 9:1 sigri Tottenham á Wigan í nóvember og hefur aðeins einu sinni komið við sögu síðan. Þá kom hann inná gegn Manchester United og mátti þola annan skell, 0:5.
Edman kom til Wigan í ársbyrjun 2008 en náði aldrei að festa sig í sessi hjá félaginu. Hann lék áður með Rennes i Frakklandi, Tottenham í Englandi, Heerenveen í Hollandi, AIK í Svíþjóð, Karlsruhe í Þýskalandi og Tórínó á Ítalíu, en hafði spilað fimm fyrstu ár ferilsins í meistaraflokki með Helsingborg. Edman á að baki 57 landsleiki fyrir Svíþjóð og hefur skorað eitt mark.
Ljóst er að varnarmaðurinn ætlar sér að ljúka ferlinum með Helsingborg því hann hefur skrifað undir fimm ára samning við félagið.
Til baka