Kvikmyndaleikarinn John Travolta greindi frá því í lögregluskýrslu eftir að sonur hans Jett lést á Bahamaeyjum í janúar á þessu ári að pilturinn hafi verið einhverfur.
Sögusagnir hafa lengi verið uppi um að Jett, sem var sextán ára, hafi verið einhverfur en Travolta hefur ekki viljað staðfesta það opinberlega. Í lögregluskýrslu sem vitnað er til í tímaritinu National Enquirer segir hann hins vegar að Jett hafi verið flogaveikur og einhverfur.
Travolta og eiginkona hans Kelly Preston hafa haldið því fram opinberlega að Jett væri haldinn Kawasaki-sjúkdómnum sem leggst nær eingöngu á ungabörn. Þau eru meðlimir í Vísindakirkjunni sem viðurkennir ekki tilvist einhverfu eða annarra geðsjúkdóma.
Eftir lát Jetts var getum að því leitt að hann hefði því ekki fengið viðeigandi læknismeðferð.