ÚTÓN tekur yfir Iceland Airwaves

Icelandair og Útflutningsskrifstofa íslenskrar tónlistar, ÚTÓN, undirrituðu í dag samstarfssamning um rekstur tónlistarhátíðarinnar Iceland Airwaves til næstu fimm ára. ÚTÓN hefur samhliða þessu gert samning um að taka við allri starfsemi sem snýr að rekstri hátíðarinnar af fyrri rekstraraðila, Hr. Örlygi. 

Jafnframt hefur Reykjavíkurborg lýst yfir vilja til að vera áfram helsti styrktaraðili hátíðarinnar.

Iceland Airwaves hefur sem kunnugt er unnið sér sess á undanförnum áratug sem stærsta og mikilvægasta tónlistarhátíð landsins fyrir framsækna tónlist. Hún hefur verið haldin árlega í október frá árinu 1999 og laðar að sér yfir 1800 tónlistaráhugamenn erlendis frá og þar af mikinn fjölda fjölmiðafólks, að því er segir í tilkynningu.

Tilgangur hátíðarinnar er að fjölga ferðamönnum til Íslands á haustin, utan hefðbundins ferðatíma, stuðla að menningarlegri fjölbreytni og efla íslenska tónlist, ásamt því að koma íslenskum tónlistarmönnum á framfæri erlendis og í erlendum fjölmiðlum.

• Blogga um frétt