Það var fögur sjón sem blasti við nemendum og starfsfólki Fellaskóla í upphafi haustannarinnar.
Listamaðurinn Arnór Kári Egilsson var fenginn til þess að gera litríkt vegglistaverk á auðan vegg í anddyri skólans og vann hörðum höndum ásamt tveimur hæfileikaríkum nemendum Fellaskóla, þeim Berglindi og Armandas, á meðan samnemendur þeirra og kennarar voru í sumarfríi.
Ævintýralegt vegglistaverk prýðir nú vegginn og tekur á móti öllum þeim sem ganga inn í skólann.
„Við erum svo ótrúlega ánægð með samvinnuna og það var alveg hreint dásamlegt að sjá Berglindi og Armandas vinna með Arnóri. Við vildum hafa eitthvað litríkt og skemmtilegt í anddyrinu til að taka á móti nemendum og gestum.
Það er ekki hægt að byrja skóladaginn betur en með bros á vör og það er svo sannarlega það sem verkið þeirra gerir, það færir gleði og maður er alltaf að uppgötva eitthvað nýtt og skemmtilegt þegar maður staldrar við og horfir á það,“ segir Inga Björg Stefánsdóttir, deildarstjóri tónlistar og sköpunar í Fellaskóla og forgöngumaður verkefnisins.
Arnór Kári hefur skreytt fjöldann allan af veggjum víðs vegar um höfuðborgarsvæðið og því er alls ekki ólíklegt að fólk hafi rekist á verk eftir listamanninn á ólíklegustu stöðum.
Hann segir verkefnið í Fellaskóla hafa verið skemmtilegt og þá sérstaklega að vinna við hlið ungra og upprennandi listamanna.
Var alltaf planið að gera þetta með nemendum?
„Já, eiginlega. Ég ræddi við Ingu Björgu og við ákváðum í sameiningu að það væri sniðugt að ég myndi hitta nokkra nemendur skólans og sjá hvort það væri áhugi á meðal þeirra að taka þátt í sköpunarferlinu.“
Arnór Kári segir Berglindi og Armandas hafa málað mikið fríhendis og sýnt mikla hæfileika.
„Sko, ég kom með grófa skissu en undirstrikaði í gegnum ferlið að þetta væri þeirra listaverk og að þau mættu því leika lausum hala. Ég var þeim til halds og trausts en Berglind og Armandas eru bæði listhneigð og með ólíka styrkleika og áttu í engum vandræðum með að skapa fallegt vegglistaverk.“
Berglind og Armandas eru mjög stolt af vegglistaverkinu og sammála um að það sé gaman að mæta í skólann og sjá sköpunarverkið sem þau unnu hörðum höndum við að búa til í sumar.
Hvernig hafa viðbrögð samnemenda verið?
„Nemendur hafa sýnt mjög góð viðbrögð en lítið verið að koma og tala við okkur. Vinir okkar hafa hrósað okkur og sagt kúl, flott og svoleiðis.“