Senda inn efni
Dæmdur í lífstíðar fangelsi fyrir að misþyrma drengjum kynferðislega
Sextugur breskur milljónamæringur, sem misþyrmdi fjölda drengja kynferðislega, hefur verið dæmdur í lífstíðar fangelsi en hann getur sótt um reynslulausn eftir rúm sex ár. Brotaferill mannsins er talinn hafa varað í fjóra áratugi.
Dómur var kveðinn upp yfir William Goad í borginni Plymouth fyrir brot gegn 14 drengjum á aldrinum 8-16 ára. Talið er að Goad hafi brotið gegn mun fleiri drengjum og vitni sagðist hafa heyrt hann stæra sig af því að hafa slegið eigið met í því að misnota 142 drengi á einu ári.
Sum fórnarlamba Goads báru að þeir hefðu verið beittir ofbeldi allt að 3-4 sinnum í viku á 2-3 ára tímabili. Saksóknarar sögðu, að Goad hefði boðið drengjunum vel launuð störf í verslun sinni og síðan boðið þeim heim til sín þar sem misnotkunin hófst.
Goad játaði á sig þau brot, sem hann var ákærður fyrir. Hann hélt því fram að hann hefði verið misnotaður sjálfur þegar hann var drengur, en vildi ekki veita lögreglu aðstoð við að rannsaka þær fullyrðingar.
Til baka