Bresk tengsl sprengjumanns rannsökuð

Frá miðborg Stokkhólms í dag þar sem sjálfsvígsárásarmaðurinn lét lífið …
Frá miðborg Stokkhólms í dag þar sem sjálfsvígsárásarmaðurinn lét lífið í gær. Reuters

Breska öryggislögreglan rannsakar nú tengsl mannsins sem sprengdi sjálfan sig í loft upp í Stokkhólmi í Svíþjóð í gær við Bretland. Breska blaðið The Guardian greinir frá því að árásarmaðurinn hafi heitið Taimour Abdulwahab al-Abdaly, og að hann hafi fæðst í Írak en verið sænskur ríkisborgari.

Fram kemur í blaðinu að hann hafi sprengt sprengju í bifreið í miðborginni áður en hann hafi sprengt sjálfan sig í loft upp í miðborg Stokkhólms. Hann var sá eini sem lést. Tveir særðust hins vegar en áverkar þeirra eru ekki sagðir vera alvarlegir.

Þá segir á vef The Guardian að hann hafi útskrifast með BSc próf í íþróttafræði frá háskólanum í Bedforskíri árið 2004 og að hann hafi dvalið í Luton. Blaðið hefur upplýsingarnar eftir hátt settum breskum embættismönnum.

Vísað er til þess sem kemur fram í sænska dagblaðinu Dagens Nyheter að maðurinn hafi ferðast til Bretlands og Jórdaníu áður en hann lét til skarar skríða í Stokkhólmi.

Þá segir að Abdaly, sem var 29 ára gamall, hafi gefið Luton upp sem heimilisfang sitt á íslamskri stefnumótasíðu. Þar hafi hann verið að leita sér að nýrri eiginkonu og kemur fram að hann greint frá því á síðunni að hann hafi kynnst fyrstu eiginkonu sinni í Bedfordskíri.

Bifreið mannsins var aftur á móti skráð í Svíþjóð og þá snerust hótanir sem komu fram í tölvupósti sem var sendur öryggislögreglunni og fjölmiðlum í Svíþjóð um sænsk málefni. M.a. var vísað til Svíans Lars Vilke sem teiknaði skopmynd af Múhameð spámanni í hundslíki árið 2007 og veru sænska hersins í Afganistan.

Þá segir í frétt The Guardian að aðeins ein af nokkrum sprengjum sem Abdaly hafi verið búinn að festa við sig hafi sprungið, en hann lést í kjölfarið.

Fredrik Reinfeldt, forsætisráðherra Svíþjóðar, hefur fordæmt árásina. Hann hefur hins vegar hvatt menn til að sýna stillingu og segir að ekki sé búið að sýna fram á tengsl á milli tölvupóstsins og sprengjuárásanna. Unnið sé að rannsókn málsins og á meðan hún sé í gangi eigi menn að fara varlega í að draga ályktanir.

The Guardian hefur eftir heimildarmönnum sínum innan bresku öryggislögreglunnar og leyniþjónustunnar að Abdaly hafi verið einn af fjölmörgum einstaklingum sem hafi dvalið um tíma í Bretlandi og orðið fyrir áhrifum af hugmyndafræði al-Qaeda hryðjuverkasamtakanna.

Heimildarmennirnir segja að ekkert bendi til þess að al-Qaeda leiðtogi hafi stjórnað aðgerðum Abdaly. Líklegt þyki að hann hafi skipulagt árásina sjálfur.

Þá segja heimildarmennirnir að sú staðreynd að árásin í gær hafi mistekist gefi til kynna að al-Qaeda geti ekki veitt liðsmönnum sínum almennilega þjálfun.

Hryðjuverkasérfræðingar telja að al-Qaeda og bandamenn þeirra muni leggja áherslu á árásir sem þessar. Þannig í stað þaulskipulagðra og flókinna aðgerða líkt og árásirnar á Bandaríkin þann 11. september 2001 voru sé áhersla lögð á einn mann sem geri óvænt árás þegar tækifæri gefst.

Lögreglumenn verða mjög sýnilegir í borginni á næstunni.
Lögreglumenn verða mjög sýnilegir í borginni á næstunni. Reuters
Lögregluyfirvöld fóru yfir stöðuna með blaðamönnum í morgun.
Lögregluyfirvöld fóru yfir stöðuna með blaðamönnum í morgun. Reuters
Fredrik Reinfeld, forsætisráðherra Svíþjóðar, hefur hvatt menn til að sýna …
Fredrik Reinfeld, forsætisráðherra Svíþjóðar, hefur hvatt menn til að sýna stillingu og draga ekki óþarfa ályktanir. Reuters
Slökkviliðsmaður slekkur eld í bifreiðinni sem sprakk í Stokkhólmi í …
Slökkviliðsmaður slekkur eld í bifreiðinni sem sprakk í Stokkhólmi í gær. Reuters
mbl.is
Fleira áhugavert
Fleira áhugavert