Norðmaður eftirlýstur vegna sprengjutilræðis

Norska rannsóknarlögreglan Kripos hefur lýst eftir Norðmanni á alþjóðavísu vegna meintrar aðildar hans að sprengjutilræðinu gegn liðsmönnum Hizbollah-samtakanna í Beirút í Líbanon í síðustu viku sem kostaði 37 mannslíf auk þess sem um 3.000 manns hlutu benjar af þegar fjarskiptatæki liðsmanna Hizbollah-sprungu samtímis um alla borg tvo daga í röð.

Frétt af mbl.is

Fjarskiptatæki um alla borg sprungu samtímis

Fyrri daginn sprungu símboðar en þann síðari talstöðvar og er Norðmaðurinn talinn hafa komið að því að selja samtökunum fyrrgreindu tækin. Tilkynnt var að hann væri horfinn á miðvikudaginn eftir að hann hafði ekki mætt til vinnu – fyrst á mánudaginn.

Norska öryggislögreglan PST hefur einnig hafið rannsókn á hvarfi mannsins sem var, að sögn vinnuveitanda, á ráðstefnu í Bandaríkjunum í síðustu viku, en vinnuveitandi kveðst ekkert hafa heyrt frá honum síðan á miðvikudaginn fyrir rúmri viku.

Eigandi búlgarsks fyrirtækis

Maðurinn er norskur ríkisborgari en Noregur er þó ekki fæðingarland hans og hefur fjölskylda hans í upprunalandinu heldur ekki heyrt frá honum.

„Eftir að fréttirnar [af sprengjutilræðinu] bárust reyndum við að ná sambandi við hann, en hann hefur engu svarað. Bróður hans hefur heldur ekki tekist að ná í hann. Við bíðum þess að heyra frá honum,“ segir ættingi mannsins í viðtali við fjölmiðla í upprunalandinu.

Er maðurinn skráður eigandi búlgarsks fyrirtækis sem selt hefur Hizbollah-samtökunum símboða en samtökin eru þess fullviss að Ísraelar standi á bak við ódæðin í síðustu viku.

Alls eru 410 Norðmenn eftirlýstir á alþjóðavísu samkvæmt skrám Kripos og má sjá átta þeirra á síðu alþjóðalögreglunnar Interpol þar sem hún birtir myndir af og upplýsingar um eftirlýsta.

NRK

Nettavisen

VG

• Blogga um frétt