Háttsettir bandarískir embættismenn hafa staðfest að talið sé líklegt að þeir Uday og Qusay, tveir elstu synir Saddams Husseins fyrrum forseta Íraks, hafi verið meðal þeirra sem féllu í löngum skotbardaga í Mosul í Norður-Írak í morgun. Fox sjónvarpsstöðin hefur eftir embættismönnum að líkurnar á þessu séu taldar 90-95%. Embættismennirnir, sem fréttastofur vitna til, vilja ekki láta nafns síns getið en einn þeirra segir að beðið sé niðurstöðu DNA-rannsóknar áður en formleg staðfesting verði gefin út á að um syni Saddams sé að ræða.
AFP fréttastofan hefur eftir ættingjum Nawafs al-Zaidans, eiganda hússins og öðrum heimamönnum í Mosul, að al-Zaidan hafi komið upplýsingum til Bandaríkjahers um að Uday og Qusay og lífvörður að nafni Abdul Samad hafi leitað skjóls í húsi hans og hann vilji losna við þá.
Íbúar í Mosul segja að skotið hafi verið á húsið úr bandarískum herþyrlum eftir að skotbardagi braust út þegar bandarískir hermenn reyndu að komast þar inn. Bardaginn stóð í fjórar stundir en síðan voru fjögur brunnin lík borin út úr húsinu.
Kúrdneskur embættismaður sagði AFP að Uday og Qusay hefðu verið meðal þeirra sem féllu í bardaganum. Svæðið var enn girt af síðdegis í dag.
Aðrir sjónarvottar hafa sagt AFP í Baghdad að al-Zaidan, sjeik í Bu Issa ættbálknum, og sonur hans hefðu verið handteknir í kjölfar bardagans. Skotið hafi verið allt að 20 flugskeytum úr þyrlum á húsið og er það nú rústir einar.
Bandaríkjaher hefur sett 25 milljónir dala til höfuðs Saddams og 15 milljónir til höfuðs sona hans. Qusay var næstráðandi föður síns í ríkisstjórn Íraks og líklegur arftaki hans. Hann stjórnaði öryggissveitum Íraks og hersveitum Lýðveldisvarðarins svonefnda. Uday var kunnur fyrir grimmd. Hann stjórnaði svonefndum Fedayeen-sveitum, sem börðust við Bandaríkjaher í Íraksstríðinu en talið er að félagar úr þeim sveitum standi nú fyrir skæruhernaði gegn Bandaríkjamönnum í Írak.
Saddam á þriðja soninn og þriggja dætra en lítið hefur borið á þeim.