Læknar í Víetnam hafa fjarlægt þrjá steyputeina úr maga manns, sem gleypti þá í ölæði.
Huynh Ngoc Son sat að hrísgrjónavíndrykkju í maí ásamt félögum sínum. Þegar langt var liðið á kvöld hvöttu drykkjufélagar Sons hann til að gleypa teinana sem voru 17 sentimetra langir og 5 millimetra þykkir.
Son kom á sjúkrahús í Hanoi í síðustu viku og kvartaði yfir sárum magaverkjum. Að sögn læknis á sjúkrahúsinu sýndu röntgenmyndir steyputeinana í maga Sons. Teinarnir voru fjarlægðir með skurðargerð og segir læknirinn að Son muni ekki bíða varanlegt heilsutjón af.