Colin Powell heilsaði upp á Colin Powell

Kötturinn Colin Powell hitti í dag nafna sinn, utanríkisráðherra Bandaríkjanna, sem bar lof á kisa og sagði að hann væri besti köttur landsins. „Halló Colin, hvað segir þú gott," sagði utanríkisráðherrann þegar hann var kynntur fyrir kettinum Colin Powell í Washington í dag. „Það er gaman að fá þig í heimsókn."

Hinn fjórfætti Colin Powell, sem býr í Brookfield í Connecticut og er í eigu Sharyn og Sig Hauck, malaði stuttlega en svaraði ekki frekari spurningum, hvorki frá utanríkisráðherranum né blaðamönnum. Kötturinn var nýlega valinn köttur ársins í Bandaríkjunum af sambandi bandarískra kattavina.

Hauck sagði síðar, að þau hjónin skírðu alla ketti sína í höfuðið á kunnum bandarískum blökkumönnun. Foreldrar Colins Powells hétu eftir tónlistarmanninum Isaac Hayes og rithöfundinum Jamaica Kincaid.

• Blogga um frétt