Íslandsmet í hópknúsi var slegið hjá styttunni af Sæmundi á selnum framan við Háskóla Íslands klukkan tvö í dag. Hópknúsið, sem auka á samkennd og kærleika innan háskólasamfélagsins, er liður í árlegum Stúdentadögum þar sem nýnemar eru boðnir velkomnir í skólann. Talið var inn í knúsið með sérstökum teljara til ná þeim fjölda sem þurfti til svo íslandsmetið springi. Úrhelli skall á í sama mund og hópknúsið fór fram en það aftraði 156 þátttakendum ekki frá því að slá íslandsmet, að sögn Önnu Pálu Sverrisdóttur, formanns nýnemaviku- og Stúdentadagsnefndar.
Margt annað er í boði á Stúdentadeginum. Var meðal annars slegið upp tjaldi og grillaðar pylsur á meðan nemendur föðmuðust í rigningunni. Sagði Anna Pála að fjöldi manns hafi beðið af sér skúrinn í tjaldinu. Hefði hópknúsið orðið enn stærra ef ekki hefði verið fyrir rigninguna. Í tjaldinu lék hljómsveitin Ske fyrir gesti og gangandi.
Stúdentadagurinn var settur í Hátíðarsalnum í Háskóla Íslands á hádegi í dag með ræðukeppni á milli stúdenta og kennara. Var þar rætt um það, hvort konur væru að taka yfir í þjóðfélaginu. Hannes Hólmsteinn var valinn ræðumaður keppninnar. Hannes talaði hins vegar svo langt yfir settan ræðutíma að hann hlaut umtalsverðan fjölda refsistiga, með þeim afleiðingum að lið kennara tapaði.