Nylon flokkurinn sendir væntanlega frá sér fyrstu smáskífu sína í Bretlandi í byrjun febrúar 2006. Stúlkurnar í Nylon, þær Alma Guðmundsdóttir, Emilía Björg Óskarsdóttir, Klara Ósk Elíasdóttir og Steinunn Þóra Camilla Sigurðardóttir, flytja til Bretlands í byrjun næsta árs til að geta betur sinnt kynningarvinnu og tónleikahaldi þar og á meginlandi Evrópu.
Nylon-flokkurinn hljóðritaði í september síðastliðnum Rolling Stones-lagið „Have You Seen Your Mother Baby“, undir stjórn Steve Lavine upptökustjóra. Upptökur fóru fram í Englandi. Að sögn Einars hefur útgáfa Nylon af þessu þekkta lagi mælst vel fyrir meðal fagmanna í tónlistarbransanum og verður það líklega titillag á fyrstu smáskífu Nylon í Bretlandi. Það verður væntanlega sent til spilunar á útvarpsstöðvum þar í landi í lok janúar.
Að sögn Einars fengu þeir Mick Jagger og Ron Wood, úr Rolling Stones, að heyra útgáfu Nylon af laginu í New York á dögunum. „Þeir heimtuðu að fá að hitta Ísdrottningarnar, eins og þeir kölluðu Nylon,“ sagði Einar. Umboðsmaður Nylon í Bretlandi er Martin O’Shea, fyrrum umboðsmaður stúlknasveitarinnar Atomic Kitten sem naut mikilla vinsælda um allan heim. Af breskum stúlknasveitum hafa aðeins Spice Girls náð meiri vinsældum.
Íslensk plötuútgáfa í London
Stofnað hefur verið íslenskt útgáfufyrirtæki í Bretlandi, Believer, sem mun einbeita sér að útgáfu tónlistar með Nylon-flokknum og markaðssetningu hans. Fyrirtækið er í eigu Einars Bárðarsonar, umboðsmanns Nylon, og íslenskra og erlendra fjárfesta. Einar mun stýra daglegum rekstri Believer-útgáfunnar. Believer hefur þegar gert dreifingarsamning við tónlistarfyrirtækið Right Track, sem er undir hatti afþreyingarrisans Universal. Right Track mun leggja höfuðáherslu á að markaðssetja Nylon á næsta ári, að sögn Einars.
„Það er gamall draumur minn að koma íslenskri tónlist á framfæri erlendis, vonandi rætist hann nú,“ sagði Einar.
Nánar er fjallað um þetta í sunnudagsblaði Morgunblaðsins.