Senda inn efni
Forstjóri KB banka með hæstu tekjurnar
Hreiðar Már Sigurðsson, forstjóri Kaupþings banka, var með 22,5 milljónir króna á mánuði að jafnaði í tekjur á síðasta ári, samkvæmt niðurstöðum Frjálsrar verslunar, en tekjublað tímaritsins kom út í dag. Halldór J. Kristjánsson, bankastjóri Landsbankans, var með 20,2 milljónir á mánuði samkvæmt útreikningum blaðsins.
Styrmir Þór Bragason, framkvæmdastjóri MP fjárfestingarbanka, var með 16,5 milljónir króna að jafnaði í tekjur á mánuði, Jón Sigurðsson, framkvæmdastjóri fjárfestingasviðs hjá FL Group, var með tæpar 14,8 milljónir á mánuði og Þórarinn Sveinsson, forstöðumaður eignastýringar KB banka, var með 14,1 milljón. Sigurður Helgason, fyrrum forstjóri Flugleiða, var með 11,8 milljónir á mánuði að mati Frjálsrar verslunar.
Í blaðinu eru birtar upplýsingar um tekjur 2400 einstaklinga, sem reiknaðar eru eftir útsvari þeirra eins og það birtis í álagningarskrám. Blaðið tekur fram, að um sé að ræða skattskyldar tekjur á árinu 2005 og þær þurfi ekki að endurspegla föst laun viðkomandi og þar eru heldur ekki fjármagnstekjur taldar með.
Til baka