Innlent | mbl | 25.11.2008 | 11:15 | Uppfært 11:34

Krafa um að viðtali við Geir verði skilað

Páll Magnússon, útvarpsstjóri, hefur gefið G. Pétri Matthíassyni, fyrrverandi fréttamanni Sjónvarpsins, sólarhringsfrest til að skila gögnum sem hann tók í heimildarleysi frá Ríkisútvarpinu og biðjast afsökunar á framferði sínu.

Fram kom í fréttum RÚV, að tilefnið sé að Pétur birti á bloggsíðu sinni viðtal sem hann tók við Geir H. Haarde forsætisráðherra, í janúar 2007 þegar hann starfaði sem fréttamaður Sjónvarpsins.

Í viðtalinu spurði Pétur Geir um upptöku evru án inngöngu í ESB. Geir stöðvaði viðtalið í miðjum klíðum þar sem hann var ósáttur við spurningar Péturs. Myndbandið sýnir síðan samtal milli Geirs og Péturs í kjölfarið. Þessi upptaka var ekki sýnd í Sjónvarpinu.

Í bréfi Páls til starfsmanna RÚV segir hann að verði Pétur ekki við tilmælum sínum verði málið afhent lögfræðingum Ríkisútvarpsins tilmeðferðar.