Háir vextir fæla frá

ÞAað sem helst leiðir til þess að fyrirtæki í vandræðum fá ekki þá aðstoð frá bönkunum sem þau þurfa á að halda eru slæm lánakjör, og þar ræður vaxtastigið mestu. Þetta segir Vilhjálmur Egilsson, framkvæmdastjóri SA. Hann telur mikla nauðsyn bera til þess að stýrivextir verði lækkaðir sem allra fyrst. Þeir eru nú 15,5 prósent og taka lánakjör banka mið af þeim.

„Hjá fyrirtækjunum er staðan að versna dag frá degi, öðru fremur vegna vaxtanna. Þau fyrirtæki sem hafa getu til þess að ráðast í fjárfestingar, halda að sér höndum vegna þeirra lánakjara sem eru í boði. Fyrirtækin sem eru að glíma við erfiðleika, sem eru fjölmörg, þurfa að búa við mögnun á vandamálum sínum vegna vaxtastigsins. Þetta ástand getur ekki varað lengur, nema þá með hreint út sagt hörmulegum afleiðingum. Það er alveg sama hvaða rekstrarþætti menn skoða. Það er ekkert sem menn fá til þess að bera sig með þá vexti sem hér eru nú, og hafa verið um alltof langt skeið.“

Haft var eftir Finnbirni A. Hermannssyni, formanni Samiðnar, í Morgunblaðinu í gær að staða fyrirtækja, einkum verktakafyrirtækja, hefði þyngst verulega að undanförnu og nú væru flest að berjast „upp á líf og dauða.“ Vilhjálmur tekur undir þetta og segir byggingariðnaðinn sérstaklega glíma við mikil vandamál, þar sem verkefnaskortur sé helsta vandamálið. „Menn hafa verið duglegir við að ná sér í verkefni eins og hægt er. Núna finna hins vegar flest fyrirtæki fyrir því áþreifanlega að algjört stopp er að myndast á byggingarmarkaði,“ segir Vilhjálmur.

Samkvæmt heimildum Morgunblaðsins hafa mörg fyrirtæki, verktakar þar á meðal, óskað eftir því að bankarnir veiti meiri fyrirgreiðslu en þeir hafa gert.

Þeir bankastarfsmenn sem Morgunblaðið ræddi við í gær sögðu bankana reyna allt sem þeir gætu til þess að koma til móts við fyrirtæki, hins vegar væru lánakjör með þeim hætti að fá fyrirtæki gætu borgað af lánum með góðu móti. Auk þess væri staða margra fyrirtækja slæm, sérstaklega í byggingariðnaði, og í raun lítið sem bankarnir gætu gert til þess að hjálpa þeim – annað en að hjálpa til við að draga úr kostnaði og ná saman endum um hver mánaðamót.

Nánar er fjallað um málið í Morgunblaðinu í dag.