Vill kosningar í vor

Jón Gunnarsson, Ragnheiður Elín Árnadóttir og Bjarni Benediktsson, þingmenn Sjálfstæðisflokks.
Jón Gunnarsson, Ragnheiður Elín Árnadóttir og Bjarni Benediktsson, þingmenn Sjálfstæðisflokks. mbl.is/Heiðar Kristjánsson

Jón Gunnarsson, þingmaður Sjálfstæðisflokksins, segir ábyrgð Alþingis mikla við þær erfiðu aðstæður sem eru í samfélaginu í dag. Hann vill kosningar í vor. Þetta kemur fram í grein sem hann hefur sent á mbl.is.

„Það er skylda okkar sem þingmanna og sú ábyrgð sem við tókumst á hendur þegar við vorum kjörin á Alþingi að bregðast við af öllu afli.

Núverandi ríkisstjórn er ekki vandanum vaxin. Of mörg og djúpstæð ágreiningsefni hafa orðið til þess að sómasamleg afgreiðsla brýnni mála situr á hakanum og vandinn vex með hverjum degi.

Það er skylda okkar þjóðkjörinna þingmanna að koma strax á starfhæfum meirihluta á Alþingi. Sá meirihluti verður að forgangsraða sínum verkefnum í þágu þjóðarinnar. Ný ríkisstjórn á að einbeita kröftum sínum að fáum málaflokkum s.s. almennum úrræðum gagnvart vanda heimilanna, eflingu atvinnulífs, aukinni fjárfestingu erlendra aðila í íslensku atvinnulífi, breytingum á núverandi lamandi skattheimtukerfi og niðurstöðu í Icesave málinu. Þetta eru þau verkefni sem þingið á að skipta sér upp í vinnuhópa til að leggja nýrri ríkisstjórn lið í að koma áfram.

Önnur verkefni skipta litlu máli við þær aðstæður sem uppi eru. Við eigum því að draga eins og kostur er úr fjárútlátum vegna aðildarviðræðna við EU (ESB innskot mbl.is) og við eigum að fresta stjórnlagaþingi. Eflaust má finni fleiri slík mál sem geyma má og vinna að síðar. Það er ekki réttlætanlegt að eyða milljörðum króna í slík verkefni á meðan við getum ekki brauðfætt þjóðina, skapað henni öruggt heilbrigðiskerfi og aðgang að góðri menntum. Hér verður að forgangsraða í þágu þjóðar.

Við verðum að gefa ungu fólki von, við verðum að stöðva landflótta, auka verðmætasköpun og atvinnu.

Ef Alþingismönnum er í alvöru annt um virðingu sína eru þetta þau verkefni sem við eigum að sameinast um. Þeir þingmenn sem ekki eru tilbúnir í þá vegferð geta farið sína leið. Ég treysti því að meirihluti þingmanna finni til ábyrgðar sinnar og að þeir séu tilbúnir að leggjast í þessa vinnu.

Það á að tímasetja kosningar næsta vor og þá getur þjóðin kveðið upp sinn dóm."

mbl.is
Fleira áhugavert
Fleira áhugavert